Kryeministri në dorëheqje, Ramush Haradinaj mbrëmë është kthyer nga Haga në Kosovë. Lajmin e ka bërë të ditur vet Haradinaj, i cili ka theksuar “sapo u ktheva nga Haga, e nesër vazhdojmë me punë”.

“Si Qeveri në dorëheqje, ashtu siç e kam cekur edhe në vendimin tim për dorëheqje, do t’i kryejë detyrat, se nuk guxoj të lë vakuum qeverisës, sepse Kosova nuk mund t’i bartë pasojat e vakuumit qeverisës. Me respekt për ta, palët që mendojnë ndryshe i ftoj t’i drejtohen Gjykatës Kushtetuese. Çfarëdo që të jetë vendimi i Gjykatës Kushtetuese do ta respektoj”, ka shkruar Haradinaj në Facebook.

Haradinaj përsëriti se kufijtë e Kosovës nuk guxon t’i prekë askush dhe Kosovës nuk mund t’i imponohet Dodik Republika. “Tregu për njohje po, e taksa deri në njohje. Dialog pa kushte, po menjëherë”, ka shtuar ai. Ramush Haradinaj më 24 korrik për rreth 1 orë u intervistua nga prokurorët e Gjykatës Speciale.